Carta a los pueblos del Estáu

Queríes collacies, amigues, hermanes de tolos requexos del Estáu Español qu’estos díes salís a la cai para dici-y al Réxime que si nos toquen a […]


Queríes collacies, amigues, hermanes de tolos requexos del Estáu Español qu’estos díes salís a la cai para dici-y al Réxime que si nos toquen a una tóquennos a toes.

Gracies. Con tol nuesu amor. Gracies por facenos sentir el vuesu calor d’esta comunidá invisible qu’esiste a pesar de tolos pesares.
Gracies por poner el cuerpu, que ye lo único que tenemos les que suañamos colos mundos que llevamos nos nuesos corazones.
Gracies por enllenar places con sorrises cómplices.
Gracies por compartir que la desobediencia civil y l’autodetermín son un ariete contra esti Réxime del 78 – y la so unidá indivisible – que paez dispuestu a too.
Gracies por defender que la tierra nun se merca, que’l cielu nun ye de naide, y que los suaños nun caben nes sos cárceles. Gracies por siguir caleyando, por siguir de pies. 

Nun nos representen. 

Porque anque gasten millones pa desplica-y al mundu que la so democracia ye exemplar y ta consolidada, en realidá nun tienen cárceles abondes pa zarrar tola dignidá colectiva de les que lluchamos pola memoria y pol futuru.

Porque anque quieran siguir imponiéndonos una Monarquía corrupta heriede de la dictadura y a una clas política fía del clientelismu y la economía del lladriyu, vamos siguir impugnándola.
Non, nun mos representen. Porque mentanto llamen violentos a quien carez la violencia policial, ellos siguen arriqueciéndose vendiendo armes y contribuyendo a guerres inxustes como la qu’agora carecen los nuesos hermanos y les nueses hermanes curdes.

Porque tampoco podemos asumir una delda que xeneraron elles, que torga que podamos construyir un presente y un futuru dignu.

Nun mos representen. Y por eso nun vamos aceutar que sigan afogándonos como clas trabayadora a les puertes d’otra crisis económica.

Y non, tampoco podemos – nin queremos – asumir “les contradicciones” d’una supuesta “democracia avanzada” que dexa, coles otres supuestes “democracies avanzaes” de la Xunión Europea, qu’asistamos a la matanza de siguío nel Mediterráneu, na frontera sur y en ca centru d’internamientu.

Por too ello, nun vamos abandonar la batalla por un futuru democráticu pa les nueses fíes.

Por too ello, facemos nuesa la vuesa llucha y la vuesa maxa, porque namái cola disolución d’esti réxime monárquicu del 78, podemos entamar a construyir un futuru xustu y en llibertá.

¡A les places!
¡Vamos Ganar!

18 d'octubre de 2019